An kashe karin sojojin Isra'ila a yakin Gaza
Hukumar Watsa Labarai ta Isra'ila ta bayar da rahoton kashe karin sojojin kasar uku da ji wa guda takwas munanan raunuka a Gaza.
Rundunar sojin Isra'ila ta tabbatar da kisan sojojin, cikinsu har da Kofur Lavi Ghasi, a yayin da adadin sojojin Isra'ila da aka kashe a Gaza ya kai 469 tun ranar 7 ga watan Oktoba.
Rundunar sojin ta Isra'ila ta fitar da wata sanarwa da ke cewa an kashe Kofur Lavi Ghasi (Mai shekara 19) daga Bataliya ta 931 da ke Birged Nahal a yakin da ake yi a arewacin Gaza.
Sanarwar ta kara da cewa an kashe Laftanar Yaacov Elian ( Mai shekara 20) da Laftanar Omri Shwartz (Mai shekara 21) na Bataliyar Gefen yayin gumurzu a arewacin Gaza.
Rundunar Sojin Isra'ila ta bayyana cewa an ji wa sojojinta takwas munanan raunuka a gwabzawar da suka yi a Gaza.
Isra'ila ta bai wa kashi 20 na Falasdinawan da ke Khan Younis wa'adi
Majalisar Dinkin Duniya ta ce Isra'ila ta fitar da wani sabon wa'adi, inda ta umarci mazauna yankunan babban birnin Gaza da aka yi wa ƙawanya da su gudu.
Ofishin kula da ayyukan jinƙai na MDD, OCHA, ya ce Isra’ila ta fitar da taswirori da ke nuna sabbin wuraren da suka shafi kusan kashi 20 cikin 100 na birnin Khan Younis da aka yi wa ‘yan gudun hijira.
Kafin faɗan ya barke, yankin na da mutane sama da 110,000, in ji OCHA.
Ya kuma ƙara da cewa yankin ya hada da matsuguni 32 da ke dauke da ‘yan gudun hijira sama da 140,000, wadanda akasarin su a baya sun yi gudun hijira daga arewa.
0 Comments